أزمة كرونا المستجد 

دليل توعية النساء لمواجهة وباء كرونا والتعامل مع هذه الأزمة 

مع ظهور فيروس كوفيد 19 والذي صنفته منظمة الصحة العالمية جائحة عالمية .

ومع اتباع الدول معايير لسلامة المواطنين منها تطبيق الحظر الكلي والجزئي وتطبيق نظام التباعد الإجتماعي  في دول العالم فى اللحظات دى كستات وبنات ما ينفعش  ننسى بعضنا ونقدم كل اللى نقدر نقدمه لبعض فى الأزمة دى علشان نخرج منها بسلام .

فى الأجواء دى بيظهر دورنا كنسويات فى تحسين أوضاعنا  واننا نتحرك اكتر لتحسين معاناة الستات ومضاعفات أشكال العنف الناتجة عن تطبيق بعض السياسات فى الظروف دى .

علشان كده إحنا عملنا الدليل المبسط ده علشان يكون أداة توعوية بسيطة فى أزمة كورونا .

فى الأزمات الشديدة بكل أشكالها الستات والبنات بيكونوا فى المواجهة والتصدر إحنا مدركين حجم الأعباء فى الفترة دى عليكن , زى رعاية البيت والأطفال والمسئولية من جميع النواحي التعليمية والصحية وتحملك للأعباء الاقتصادية ضخمة .

عملنا الدليل ده علشان نعرف إيه هو فيروس كورونا المستجد والتعامل وإزاى نتعامل مع الأزمة دى ؟؟وإزاى نتعامل مع أطفالنا خلال الأزمة دى ؟

ازاى نتعامل مع المشكلات اللى ممكن تحصلنا من عنف أو ضغط نفسى وإزاى نتعامل مع كل ده ؟

كمان هنحكى قصصهن مع الكورونا علشان يكون ده سجل توثيق وتأريخ الفتره دى وخطوه لتحسين اللى بنعانى منه بأشكال مختلفه .

بداية 

إيه هو مرض  كوفيد19 ؟

هو مرض معدى يسببه فيروس كورونا إللى ظهر فى الفترة اللى فاتت دى وكان مش معروف عنه أى حاجة لحد ما انتشر وتفشى فى مدينة يوهان الصينية فى أول ديسمبر 2019م .

إحنا حابين نوضح الفرق ما بين الوباء والجائحة ؟

ليه هنقول الفرق بين الوباء والجائحة لأنه زى ما عرفنا منظمة الصحة رفعت مرض كوفيد19من وباء لجائحة فإحنا حابين تعرفى الفرق بين الإتنين.

الوباء هو :ظهور حالات أمراض معدية في دولة أو مجموعة دول صغيرة متجاورة، وينتشر بصورة سريعة بين الناس.

الجائحة :ظهور حالات لأمراض معدية في أكثر دول العالم بأسره، ويصعب السيطرة على الحالات المرضية على مستوى العالم، مما يهدد صحة الناس ويتطلب إجراء تدابير طبية سريعة، وخطط عاجلة لإنقاذ البشر.

إيه هي أعراض مرض كوفيد 19 اللى سببه فيروس كورونا ؟

1. الحمى والإرهاق و الكحه الناشفه .
2. الاحساس بالألم والوجع واحتقان فى المناخير أو الرشح أو ألم فى الحلق أو الإسهال .
3. فى العادة الأعراض دى بتكون قليلة وبعد كده بتزيد .
4. فى ناس كتير ممكن تصاب بالمرض من غير ما يظهر عليهم أى أعراض و بيتعافوا .
5. 80 % من المصابين بالمرض بيتعافوا من غير ما يحتاجوا لعلاج خاص لو ما تطورت معاهم الأعراض لمرحلة صعبة .
6. بتزيد صعوبة المرض لواحد من كل ستة من اللى بيتعدوا بالمرض وبتوصل صعوبة تنفس و التهاب رئوى .
7. أكتر ناس معرضة للإصابة بالمرض المسنين واللى بيعانوا من أمراض من مشكلات مرضية زى ارتفاع ضغط الدم أو أمراض القلب أو السكر أو اللى عندهم أمراض مناعية أو مرض شديدة .
8. 2% بس من اللي اتصابوا بالمرض هما اللى تعرضوا للموت .
9. الأشخاص اللي يظهر لهم حمى وكحه ناشفه وصعوبة تنفس لازم يروح لأقرب مكان رعاية .

ازاى نحمى نفسنا من مرض كوفيد 19 (الكورونا).

المرض ينتقل عن طريق النقط والرزاز الخارجين عن طريق الكحة والعطس أو لما تقع النقط دى على أماكن انت بتلمسيها أو قربك من عطس أو كحة شخص مصاب أو لمسك لعينك أو مناخيرك علشان كده مهم إنك 

• تخلى المسافة بينك وبين أى شخص مصاب أو مش مصاب مسافة متر لمتر ونص وكل ما كانت المسافة أبعد يكون أفضل .
• غسل اليد بالصابون تحت المياه الجارية لمدة 20 ثانية .
• فرك ايدك بالكحول بإستمرار طول ما إنت بره البيت .
• تطهير الجزم وأى حاجه جايه بيها من بره البيت بميه بكلور للتطهير .
• مسح وتطهير أى أسطح عندك بكحول أو ميه بكلور .

من المهم جدا انك تفهمى إن المسئولية دى مش عليكى لوحدك لكن مسئول عنها كل شخص فى البيت لأنه مش بيتك لوحدك ده بيت كل فرد مشارك فيه وإن حماية أفراد البيت مش مسئوليتك وحدك فكل الأشخاص البالغين مسئوليتهم حماية نفسهم وجزء من مسئوليتهم حماية اللى حواليهم وتعليم القصر وحماية أفراد البيت إللى ما بيمتلكوش حماية نفسهم .

لو عندك أطفال ازاى تتكلمى معاهم عن مرض كوفيد 19 

المصدر: https://www.chla.org/blog/health-and-safety-tips/how-talk-kids-about-coronavirus-arabic

الطفل دايما بيكون عنده اعتماد كبير على إنه يفهم العالم من الكبار اللى حواليه وعلشان كده 

التواصل مهم جدا مع الأطفال والمراهقين لأنهم ممكن يشعروا بتوتر كبير لو مفيش حد مهتم من البالغين بمشاركة الأزمة معاهم وتوضيحها .

الأطفال والمراهقين محتاجين طول الوقت مساعدة الكبار إللى فى حياتهم علشان يعرفوا يفهموا الأمور بمنظور صح.

الأطفال والمراهقين ما عندهمش من التجارب فى الحياه اللى يخليهم يدركوا خطورة مرض زى كوفيد 19 ويحطوها فى مكانها الصح فمهم جدا وضرورى ان الكبار والبالغين المدركين يساعدوهم فى ده .

الأطفال لما بيدركوا خطورة أى حاجة بيتعاملوا معاها بطريقة أكثر حكمة وضبط .

الدكتورة كارين روجورس الحاصلة على درجة الدكتوراه والمتخصصة في علم النفس الإكلينيكي بمستشفى Children’s Hospital Los Angeles

بتقول ““كن على علم بأن الأطفال غالبًا ما يستمعون إلى محادثات الكبار حتى عندما لا يبدو الأمر كذلك”.

يعنى الأطفال بينتبهوا لكلام الكبار كويس جدا حتى لو بيبنوا عكس ده .

من المهم الكلام معهم بشكل مباشر وتطمينهم على اكبر قدر .

لازم نقدم معلومات وحقايق عن فيروس كورونا وتكون مناسبة لكل سن من الأطفال للمراهقين 

طيب إزاى ؟؟

قبل ما تتكلموا معاهم لازم تكونوا مستعدين وفاهمين كويس علشان تقدرو تشاركوا المعلومات معاهم بشكل دقيق .

لازم تفهمهم بإنه مش الأطفال بس اللى ممكن يتصابوا بالمرض كل الناس ومن المهم تعرفهم إن الأطفال لو اتصابوا بالمرض ما بيمرضوش جامد زى الكبار وده هيساعد فى إنهم يتطمنوا ويتعاملوا بحرص من غير ما يجيلهم توتر أو رهاب .

ولحد دلوقتى الدكاترة والعلماء مش عارفين يفسروا ليه الأطفال أقل إصابة من البالغين وليه أعراضهم بتكون خفيفة لو اتصابوا ومن المهم انه المعلومة دى تتقالهم .

لازم تتكلموا معاهم عن “العزل اصحى ” علشان يقدروا يفهموا إحنا ليه مش هنخرج كتير ولا نتفسح لأنه لو النقطة دى وضحت لهم هيفهموا إن ده هيقلل من انتشاره وبكده الأعداد ما تبقاش كبيرة فالناس اللى هتتصاب هيقدروا يلاقو دكاتره كتير متاحين يساعدوهم .

إزاى نقدر نساعد الأطفال إنهم يتعاملوا مع القلق بسبب قفل المدارس 

الأطفال نتاج الأزمة دى وبعدهم عن صحابهم وتحديدا لو طفل إجتماعى وبيحب تواجده من اصدقائه بصورة مستمرة ,ده هيخليهم مرتبكين ومتوترين جدا ويسألوا نفسهم هو احنا لسه صحاب مع صحابنا بتوع المدرسة ولا لاء ؟

التعامل مع الأزمة دي بإنك 

تتكلمى بوضوح إنها فترة لوقت معين ممكن تكون طويلة بس هتنتهى .

الأزمة دى خلت كل الناس مايشوفوش بعض وده عادى .

إنك تعملى معاهم خطط يعرفوا يتواصلوا بيها مع صحابهم زى مكالمات التليفون والإنترنت وحتى كتابة جوابات

لازم تعرفيهم انه الوضع ده مؤقت وكل الأمور هترجع زي الأول فعشان كده احنا هنستحمل 

تبعديهم بقدر الإمكان عن متابعة الأخبار المتعلقة بإطار الحياه الجديد بالشكل ده علشان يخف الضغط والتوتر 

ماتخليهومش يستخدموا وسائل التواصل لساعات طويلة وبلاش فترة الليل .

ممكن تتكلمى انت وأطفالك مع بعض علشان تخففوا من توتر كورونا 

الأطفال فى العادة سلوكهم بيتغير فى كل مرحلة عمرية من حياتهم وما بيبقوش مدركين التغير ده ولا عارفين يتعاملوا معا , وده حتما هينعكس على الأطفال فى ازاى يتعاملوا مع أزمة كورونا من غير ما يتوترو

لازم 

تفتحى بابا لأطفالك يعبروا عن اللى بيحسوا طول الوقت وتفهميه كويس وتتعاملى معاه بهدوء 

تمرنيهم على انهم يعملو حاجات يخففوا بيها من التوتر زى :

انهم يتكلموا مع أكتر حد بيثقوا فيه من الكبار 

زى انهم يكتبوا ويعبروا عن اللى جواهم 

زى الرسم والتلوين 

أخد النفس بصورة صح وطويله لما يحسوا بتوتر .

الأطفال ساعات بيستخدموا طرق كتيره يشتتوا بيها نفسهم وانتباههم علشان ما يتحطوش فى مواجهه مع المشكلة 

ده احيانا بيكون مفيد لكن لازم بدورك كأم وبدور الأب انكم تخصصوا وقت للكلام مع اطفالكم .

اخيراً : لازم يتعملوا ازاى يحموا نفسهم وده مهم وبيخفف العبء من عليكى 

لازم تعوديهم على روتين نضافة وتطهير معين وده هيساعدهم كمان على حماية نفسهم طول حياتهم

انتى والأب وأى شخص كبير في البيت هما النموذج لأى طفل 

الممارسات اللى هتطلبى من الاطفال يعملوها لازم تكونى بتعمليها بشكل واضح علشان تكون محل استجابة عند الطفل زي 

غسل الإيد بشكل متكرر أكتر من مرة بعد عمل أى حاجة .

عدم لمس العين والأنف والفم 

لو عملتى أي ممارسة من دى والطفل أخد باله انك ما إلتزمتيش بالتعليمات لازم تبادرى بحاجة تصلح الغلط ده 

زى إنك تقولى ياه أنا عملت كده ازاى لازم اقوم اغسل ايدى وتقومى تصلح السلوك ده فورا .

التجربة دى هتعلم أطفالك يتعلموا المسئولية تجاه نفسهم مش لازم تخافى دايما بصى لإيجابيات التجربة

يتناول أيضا الدليل التعريف بأنماط العنف المختلفة والتى قد تتضاعف نتاج الحظر وتدهور الأوضاع الاقتصادية وكيفية التعامل معها فى ظل هذه الأزمة وكيفية تقديم الشكاوى وتقديم الدعم فى حالات ازدياد وتيرة العنف ؟

بحسب منظمة الصحة العالمية ((WHO فإن 1 الى 3 من الستات والبنات حول العالم بيتعرضوا لعنف جسدي وجنسي وإنه بيكون مرتكبه الشريك الحميم يعنى تلت نساء العالم بيعيشوا تحت خطر مستمر .

مع انتشار الوباء  المرض ده بيخلى أفراد من الأسرة يقعدو مع بعض فترات طويلة خوفا من الإصابة وفى احتكاك مباشر مع بعض وده بيخلينا مدركين إنه البنات والستات اللى بيتعرضوا لعنف بشكل وحجم معين ممكن تتضاعف وفكرة الاستغاثة أو اللجوء لأماكن بتشكلك شكل حماية أو استدعاء أفراد فى حياتك بيشكلولك شكل من أشكال الدعم والمساندة بصورة معينة هيبقى صعب وخصوصا بعد مرحلة فتح أماكن التجمع وفتح الأسواق مع إنتشار الوباء فكتير هيبقوا ملتزمين بالتباعد خوفا من إنتشار الوباء .

الأول لازم تدركى أننا كلنا بنتشارك الأوجاع وأشكال مختلفة من العنف وإننا دورنا نشد بعض ونسند بعض .

لازم نكون واعين نتعامل مع العنف ده ازاى فى حالة إنك اتعرضتى لعنف فى أوقات ما تعرفيش تتحركى فيها وتاخدى فيها رد فعل حركى بعيد عن البيت 

بقدر الإماكن تعملى ده 

1. تخلى أوراقك الشخصية زى البطاقة وفيزا المرتب لو بتشتغلى قسيمة الجواز ..إلخ فى مكان قريب منك 
2. تقعدى فى مكان بعيد عن الشخص المعنف ولو فى إمكانية تقفلى على نفسك فى حالة إنه بدأ فى استفزازك
3. ابعدى عن المشادة الكلامية مهما استفزك لأنه أحيانا بيبقى عنده رغبه  فى ده علشان يبرر عنفه أو أذيه هتحصلك مع علمنا إنه مفيش أى مبرر لأى شكل من العنف .
4. دايما يكون معاكى ليسته فيها أرقام ونقط التواصل بينك وبين الأشخاص اللى عندهم القدرة انهم يتحركوا علشان يوقفو ده .
5. لو عندك جيران قريبين منك فممكن تتفقى على طريقة لو حصل مشادة عنيفة تعرفيهم بيها علشان يتدخلوا زى إنك تشاورى لو تقدرى أو تخبطى خبطه معينه على باب أو حيط أو شباك .
6. يكون معاكى أرقام الأماكن اللى ممكن تقدملك الخدمات والرعاية ودى الجزئية اللى هنتكلم معاكى فيها بتوسع اكتر .

ودى أرقام وأسماء لجهات ممكن تقدملك الدعم بأشكال وصور مختلفة 

خط نجدة الطفل على رقم 16000 بمجلس الأمومة والطفولة.

قطاع حقوق الإنسان بوزارة الداخلية ( ده مكاتبه موجوده فى كل الأقسام ).

خط شكاوى مجلس الوزراء على رقم 16528.

شكاوى وزارة التضامن الاجتماعى على رقم 16528.

الخط الساخن للأمانة العامة للصحة النفسية على رقم 08008880700.

أرقام وزارة الداخلية لإستقبال شكاوى المرأة تليفونياً 

(01126977444_01125977333_01126977222)

أرقام وعناوين مكاتب شكاوى المرأة فى المحافظات التابعة للمجلس القومى للمرأة .

ده رابط نشرته جريدة اليوم السابع فيه كل عناوين وأرقام تليفونات مكتب شكاوى المرأة فى جمهوريات مصر 

https://www.youm7.com/story/2017/1/16/%D9%86%D9%86%D8%B4%D8%B1-%D8%A3%D8%B1%D9%82%D8%A7%D9%85-%D9%88%D8%B9%D9%86%D8%A7%D9%88%D9%8A%D9%86-%D9%85%D9%83%D8%A7%D8%AA%D8%A8-%D8%B4%D9%83%D8%A7%D9%88%D9%89-%D8%A7%D9%84%D9%85%D8%B1%D8%A3%D8%A9-%D9%84%D8%AA%D9%84%D9%82%D9%89-%D8%B4%D9%83%D8%A7%D9%88%D9%89-%D8%A7%D9%84%D8%B3%D9%8A%D8%AF%D8%A7%D8%AA-%D8%A8%D9%8026/3057062

أرقام منظمات نسوية بتستجيب فى حال تعرضك لعنف 

– مركز قضايا المرأة المصرية 

برج الحجاز شارع المهندس عبدالهادي راضي -ترعة المجنونة سابقا -ارض اللواء-بولاق
الدكور-ناهيا، الجيزة

تليفون:

٣٧٠١٠٠٦٨
٣٧٠١٠٨٨٢
٣٧٠١٠٥٧٨
٣٧٠١٠٨٦٧

تليفونات مكتب شكاوى المجلس القومى للمرأة المعنفة 

تليفون: 

.١١٢١٩٩٧٤٧٧
٠١٢٠٥٥٧٥٣٣١
٠١٠٠٧٥٢٥٦٠٠

مركز النديم لضحايا العنف الأسرى 

عنوان المركز:

٣أ شارع سليمان الحلبي، وسط البلد، القاهرة، أمام نقابة المهندسين المصرية بشارع رمسيس.

ارقام مركز النديم هي:
01006662404

01000552793

الجمعية المصرية للتوعية والصحة النفسية ” وعــي “

العنوان :٤ شارع حسين صدقي – كورنيش المعادي – القاهره

تقديم الدعم النفسي والعلاج النفسي للفئات المهمشة والمعرضة للعنف والاضطهاد مثل المراه والأطفال والأطفال بلا مأوى .

تليفون

٠٢٢٣٥٨١٠٥١
٠١٠٠٠٥١٧٤٢٧

بيت حواء: دار إستضافة للسيدات المعنفات تابع لجمعية نهوض وتنمية المرأة.”

الملجأ لا يقدم بياناته او عنوانه بالتليفون وعلى السيدة المعنفة التوجّه إلى مركز الجمعية وهناك يتم تسجيلها ثم يتم نقلها إلى الملجأ. 

عنوان المركز الرئيسى لجمعية نهوض وتنمية المراة

٨/١٠ شارع متحف المنيل – الدور الخامس- شقة ١٢- القاهرة

تليفون

٠٢٣٦٤٤٣٢٤
٠٢٥١١٨٦٧٧

مؤسسة المراة المصرية للقانون وثقافة السلام

تعمل على تقديم الدعم والمساندة القانونية والتصدى لمناهضة العنف ضد المرأة.

العنوان: ٤١ شارع نوبار باب اللوق، القاهرة

تليفون: ٠٢٢٧٩٥٨٠٨٠

الإسكندرية 

جمعية المرأة والتنمية 1 ش ملك حفنى بحري السكة الحديد – سيدي بشر . 

مواعيد مركز المساندة الأحد والأربعاء من ٧-٩ 

تليفون

٠٣٥٥٣٠٤٩٥

المنصورة 

مركز استضافه وتوجيه المراه (حمايه المراه) المنصوره شارع محمود شاهين امام مسجد العيسوى الدور الاول

تليفون:
0502162014/ 01025830779

أسوان 

مؤسسة جنوبية حرة 

ganoubia.hora@gmail.com الإيميل:

العنوان: أسوان شارع البصيلى بجوار مجمع هميمى الجبلاوى .

البحيرة 

مبادرة بنت النيل 

رقم التليفون :

01123063303

أو إرسال رسالة عن طريق صفحة الفيس بوك :

https://ar-ar.facebook.com/7rketBntElnil/

الإسماعلية 

راديو بنات أوف لاين 

صفحة فيس بوك :

https://www.facebook.com/groups/281165311988431/

بعد استعراض أماكن تقديم الدعم فى الإبلاغ عن لعنف 

هنتكلم عن الجانب النفسى وإزاى تحافظى على ثباتك النفسى فى ظل أزمة كورونا 

احنا كستات عارفين حجم الأعباء والمخاطر والمخاوف اللى بنواجهها فى الأزمات اللى زى دى لازم نعرف اننا عندنا مسئولية تجاه بعض علشان نعبر ونمر من الأزمة دى بسلام , نقدر نبنى خطوط وسكك نقدر نعدى بيها مع بعض وقت الشراكات بينا كستات بنتشارك ألاْمنا وخوفنا لازم نؤمن بأننا ” سنعبرن معا ” .

هنشد بعض بطرق كتيرة علشان ما ننهارش نفسيا ً

بطبيعتنا كبشر كائنات اجتماعية والعزلة ممكن تأثر فيا نفسيا .

الوباء فرض علينا العزلة وإحساسنا إننا بقينا لوحدنا ضاغط وعلشان نتخطى ده ممكن نعمل بعض الممارسات الخفيفة وهيا 

اتحكمى فى درجة متابعتك للأخبار وحاولى دايما تكونى بتاخدى أخبار صح 

حاولى بقدر الإمكان تتابعى الأخبار الإيجابية وحسى بقميتها 

خلى عقلك نشيط بإستمرار ماتركزيش فى نقطة سلبية وتقفى عندها 

• نتواصل مع المقربين لينا تليفونيا بإستمرار

ممكن نستخدم التواصل بالكاميرا لو بنتستخدم أى أداة من وسائل التواصل متاح فيها ده .

لو المكان اللى انت عايشة فيه مكان للتمشية ممكن تعملى ده كروتين يومى فى مكان مش زحمة و تراعى المسافات الأمنة من انتقال الفيرس .

تلعبى رياضة فى البيت .

تسمعى موسيقى وإنت بتعملى أى نشاط أو فى وقت فراغك .

القراية والفرجة على المسلسلات والأفلام . 

الطبخ وعمل أكلات ووصفات جديدة بتتناسب مع إمكانياتك من مجهود بدنى لحد الإمكانيات المادية.

مشاركة احاسيسك مع الناس اللى فى دايرة أمانك مهم جدا إنك تتكلمى وتعبرى .

مهم جدا نعرف إن السلوك أو نظام أكلك بيأثر على حالتك النفسية بشكل كبير وده قاله كتير من الختصين النفسين فلازم ناخد بالنا من إننا ناكل أكل صحى ومفيد  

مهم نتابع مع مختصين نفسين وده حاليا بيتقدم كتير عن طريق التليفون والمنصات الأون لاين 

ممكن نستخدم منصات الدعم النفسى أون لاين وفى منصات كتيرة بقت متاحة ومجانية 

وزارة الصحة المصرية بتقدم دعم نفسى عن طريق التليفون عن طريق 

الخط الساخن : 105 

وعن طريق الرقمين دول :

 0220816831   _ 0800888700

مؤسسة القاهرة للتنمية والقانون:

بتتلقى  يوميا اتصالات عبر الخط الساخن الخاص بالدعم النفسي للنساء

على الرقم: 01279177326

أو على الواتس أب على نفس الرقم .

نظرة للدراسات النسوية : بتقدم دعم نفسى للعاملات بالقطاع الصحى .

تقدرى تحجزى عن طريق : 

Info@NAZRA.org.

فى النهاية 

فى كاتبة أمريكية إسمها مايا أنجلو بتقول “ في كل مرة تقف امرأة بجانب نفسها وتدعم ذاتها..فإنها تقف بجانب جميع النساء وتدعمهن، دون أن تعرف ذلك وربما دون أن تعي ذلك ” .

بنت النيل بتتمنى إن كل الستات يعبروا مع بعض أمان وسلامة وإن كل الستات فى العالم العربى يتمتعوا بالأمان والسلامة ومزيد من المكتسبات 

وكمان تقدرى تتواصلى معانا على صفحتنا على الفيس بوك واحنا هنساعدك 

https://ar-ar.facebook.com/7rketBntElnil/